Auf die selbm wend dich gegenn im vnnd laitt mit der glaffenn die seinenn ab vnd secz do
[W]enn dw abtret<e>n pist vom ross pleibt er denn auf dem ross so secz mit dein ten /// mit ann ckenn fuess vor vnd halt dein gläffenn in der mitt mit paidenn hennden vor dier twerchs also das der voder ort lennger sey wan der hinder reyt er den mit der glaffenn auf dich so streich mit dem vodern tail deiner gläffenn zw seiner rechtenn seytenn ann die dein vnd secz im do mit an mit einem austrit auf dein tenncke seytenn
wenn dw abgetretn pist zw fuess pleybt er denn auf dem ross So halt dein gläffen zw deiner rechtenn seytenn in der vndern huett mit dem ort gegenn im Reyt er dann auf dich mit der gläffen zw deiner tenncken seytenn so secz ab mit dem vodern tail deiner gläffen auch zw deiner tencken seytenn vnd spring auf dein rechte seytenn vnnd secz jm an
wenn dw abgetretn pist zw fuess rewt er denn auf dich mit seinem swert so stich im mit der gläffenn zw den plössenn vnd wart ob dw im mügst an geseczen vnd thu mit aufspringen
Wenn dw abgetretn pist pleybt er denn auf dem ross[1] vnd rewt auf dich mit dem //leseczt swert so secz dein glaffen mit dem ort auf das verist vonn dir jn die erd vnd wenn er auf dich reẅt so var da mit seinem ross zwischenn der vodern pain vnd spring auf ein seyten vnd versuech ob dw in also mit sambt dem ross vmb werffenn mügst
Der text der glaffenn wider die glaffenn zw fuess
Sper vnd ort
den vor stick stick (sic) anne forcht
Der ander stand wenn er auch abgetretn ist vnnd helt sein glaffenn vnd dw die dein so schick dich also gegenn im ste mit dem tencken fuess vor
vnd halt dein gläffenn mit der rechten hand ob dem haubt zw dem schuss vnd trit also zw im das albeg dein tenncker fues vor pleyb vnd wart das dw e scheust wenn er vnd folg pald dem schuss nach zw im mit dem swert so mag er nit gewis schiessenn vnd treyb die stuchk gegen dem swert mit der glaffenn her nach verchlärt
Das ist der text vonn an seczen vnd vonn zuckenn
Spring wind secz recht an
wert er zuck gesigt im ann
wenn ir paid abgetretn seyd zu fuess vnd yeder hat sein glaffenn wild dw dann nicht schiessen so halt dein glaffenn zw deiner rechtenn seyten jn der / huet vnder<e>nn // vnd ge also zw im vnd stich im chunstlichenn ein an alle forcht zw dem gesicht aus gestracktem arm e wann er dir ein sticht Sticht er denn gleich mit dir ein so far auf mit der gläffenn an der seinen jn das vbergeheng vnd spring do mit zw im vnd secz im oben ann fert er denn auf mit dem arm vnd wert den stich so zuck vnd secz im den ort vnder sein tenncks Rchsenn oder sunst wo dw hin magst vnd dring jn für dich weck
Ein ler wie dw zucken sold
wildw vor stechen
mit zucken lern wer prechenn
Wenn dw jm wild vor zue stechnn e wann er dier oder sunnst vor chumbst mit dem stich verseczt er denn stich so sold dw jndes wissenn wie durchwechseln oder zucken sold das er dir nit ansecz die weyl dw das thuest verseczt er denn stich starck mit der glaffenn vnd lät den ortt nebenn dir peseyt aus genn so zuck pald vnd stich zw jm zw der ander<e>n seytenn
oder pleibt er dir in der versaczung mit dem ort vor dem gesicht so zuck nicht durch Sunder pleib mit der gläffenn an der seinen vnd arbait zw der plöss dar nach vnd dw enpfindest ob er hert oder waich an gepunnden hatt
Merck wil er zichn
von schaid<e>n vnd wil er fliechen
so sold dw im /nache<n>t/
in weyshait // wart nachenn
- ↑ Bei ross befindet sich ein Schaft-s am Ende des Wortes.
