Der hannd die er obenn hat hindenn vmb dein hals wil greyffenn vnnd dich do mit vmb wenndnn so prichs mit dem vorgenanten vberfallenn
wenn dich ainer geuast hat in dem arm vnd dw in wider yedlicher denn tenncken fues fur geseczt hat vnd ist er also gescheyd das er dir mit seinem rechtn fueß schreyt auswendig hinder denn tencken vnd wil dich pey dem arm dar vber ruckn so zuck deinen fueß frischleich hinder sich auf zu ruck vnd faß in da mit seinem rechten fueß vnd stos in obenn fur die prüst so velt er
wenn dich ainer fer hinden pegreyfft vber dein achsel so far vber mit deinem arm In die pug seins elpogens ann der seytenn da der fues vor stet vnd mit der anndern hand hilf zw dir drucken auf die seytenn auswendig geriten vnd halt Im denn arm mit der ainen hannd vnd mit der anndern hand greyf im in denn drossen vnd mit dem fueß In die chnye pug seins anseczens fueß zw dir gespart mit der verssenn
Slach aus mit deiner rechtn hand sein dencke hannd vnd pegreyff im die ving seiner rechtenn hannd vnd mit der tennckenn sein rechtenn arm vber sich be schlagen vornn geuast vnnd zw ruck geworffenn vber dein tenncks pain
[S]chlach aus mit deiner rechtn hand vnd far im auf der hand zwischenn der pain vorn durch vnd faß in hindenn pein [!] der Jopenn oder auf denn elpogenn vnd heb In auf vnd stos in oben von dir mit der tenncken hand so felt er obenn auf den chopf
das magstu auch tun wenn dich ainer hat oben geuast vnd das dw dein arm paid vndenn hast so greyf mit der ainen hand vndenn durch zwischenn seiner pain mit dem anndernn stos obenn
wenn dir ainer mit seiner rechtenn hannd zwischenn deinen painenn durch fert vnd fast dich hindenn pey der Joppenn so puck dich mit dem haubt gegn Im vnd far von aussenn vndenn durch sein rechtenn arm mit deinen paidenn armen vnd hab da mit vbersich so mag er dich nicht gewerffenn
Ob dich ainer pey ainer hannt begreyffet vnd wolt dich nebenn sein ruckenn mit seinen paidn henndenn vnd hat er dich geuast bey der tennckenn hannd vnnd wolt dich rucken auf sein rechte seytenn so laß dein rechte hand vonn obenn durch vber sein tenncken arm In sein rechte seytenn vnd vasß in in der wüest mit der rechtenn hannd vnnd mit der tenncken val im / sein In // chnyepüg
vast dich ainer vorn bey der prust mit paidenn hennden so var obenn vber mit der rechtn vber sein tencke vnd twing im die vnd mit der tennckenn in sein rechtn elpogenn vnd schrennck mit dem rechten fueß
wenn dir ainer schrencken wil mit der rechten hannd dem schrenck mit dem tennckenn
schlach aus mit paiden henndn vnd fal im mit paidenn henndn In paid chnyepug vnd zeuch zu dir vnd stos in mit dem haubt oben fur die prüst vnnd wurff in zw ruck
also prich das
vas in obenn bey dem hals vnder dem vechsenn vnnd leg dich vast obenn auf in vnd trit wol zeruck mit denn füessenn das er chainen ge greyffenn mag so druckst dw in zw der erdenn
Ob er denn rechtn fues fur seczt so zeuch in mit der tenncken hand bey seiner rechtenn hannd vnd slach in ann den ennckel seins rechtn fueß mit dem tenckenn vnd ruck in nyder
oder val im mit der rechtn hannd in die chel vnd druck in vber ruckh
Helt dich ainer los pey dem armen so greyff mit deiner tenncken hand nach seiner rechtn vnd begreyff in bey denn fingern vnnd halt in vest vnnd slach auf mit deinem rechten vnd far Im durch vnder seinen rechtn arm vnd fach In in die wüest vnnd mit der tennckenn In sein chnyepug
