und auch alle blesen und wen einer waich ist so bis du starck un wen einer starck ist so bis du waich so vinstu schwech uns sterck mit ein ander gut in der hut, Deo gracz[ia]s amen. Nicolaus thun im 1489 iare in virgilia maria virginis | visirarionis
Item es ist zu wißen das die neche die kunst bricht und die twai hengen und das versthieben und die hol versatzung und die uldin kunst, die funf stuck die brechen den Zetel, auch vind man wol ein der in brecht mit ainem oder zwein stucken den es bricht ein haw den anderen und ein stuck das ander und ein stich bricht den anderen, glosa merk
| Das ist vo~ dem ringen |
In allen ringen sollen sein drey ding: das erst die kunst, das ander die schnelligkait, das drit die recht einlegung der sterk. darumb soltu mercken das das best ist schneligkait die nit zu bruchen lass komen. Auch soltu mercken das man allen kranckhen sol vorringen und sol auch allen gleichen mit ringen und sol allen starcken nachringen in alen vor ringen vart der schneligkait und in allen mitringen wart der wag und in allen nachringen wart der kniebige
angeschlagen mit der rechten handt und unden nider gefaren mit recht in die kniebige in seinen linckh fues. die linck hand an sein linckhen seiten zuckh mit der rechten handt und stoss üben mit der lincken so mus er vallen.
