Transversarius contra ictum qui dicitur curvus.
Ita te componas hunc in habitum: introgreditor pede sinistro et recta latus capitis adversarii dextrum transversario pulsabis, ex eo propugnaculo si te fuerit aggressus feriundo transversarium, te praeponente pedem dextrum, sinistro insequeris, curvo versus adversarii latus dextrum si utaris ictu atque facie eius incisione lateris, brachium dextrum confestim appetito. Id si hostis exceperit, ab infero loco sursum, latus eius dextrum sauciato. Ictu modo praenominatum si is usurparit, tum manum sinistram e supernis ultra adversarii dextram reges, deorsum ea ratione si suppresseris, conatum eius irritum reddideris, simul etiam versus caput hostis ferias superne. Si quando is te eodem modo apprehenderit, intro pede dextro concedes, et brachio ipsius dextro manu sinistra applicata ictum avertes adversarii, aequaliterque cum ipso decertare poteris. Verum in ipso certamine recta verticem eius appetes. Sin ab eo ictu se tuebitur, tum prosiliendo versus latus adversarii sinistrum pedem sinistrum praefiges, atque supra caput acinace sublato, quam celerrime poteris, superne ictu gemino uteris. Verum is si consimili ratione contra te usus fuerit, curvum usurpando acie acinacis tui brevi eum removebis, et pariter adversarium incidendo sev feriundo aggreditor.
