Page:Cod.icon. 393 I 109v.jpg

Propugnaculum contra ictum mutatorium.

Hoc modo te accommodabis in hanc propugnaculi speciem: erectus tibiis paribus consistes, acinace supra caput sublato ita ut mucro retrorsum vergat, tum dextrum denique procedes pede, et figendi habitum arripe retro caput ex latere sinistro in adversarii dextrum vertendo. Sin autem in habitu ictus mutatorii, dextrum praeponens constiteris, et hostis mucronem praedicta ratione versus te direxerit, inflectendo ex mutatorio acinacem tolles sursum praefixo pede sinistro, punctionemque aciem longam praevertendo removebis. Interea si in triangulum concesseris, longa acie superne capit adversarii pulsato. Ictum si excipiet hostis, tum in latus eius sinistrum pedem dextrum diriges, rursus nuditatem supernam adversarii adpetes. At si is eodem ictu gemino superne fuerit contra te usus, acie tui acinacis longa removeto, nec non interea pedem sinistrum eius dextro praepones interius, simulque si brachium sinistrum ultra adversarii dextrum porrexeris, caput pulsare eius licebit. Sin autem hostis te eadem via apprehenderit, tum manu laeva brachium eius dextrum arripito, si eum repuleris, dextrum brachium ab adversario correptum et tu liberabis. Confestim vero pedem sinistrum eius dextro praefigere non cessabis, et ex eius brachio flectendo te eripies versus latus tuum dextrum, ut acies longa acinacis tui superne consistat, relato pede sinistro retrorsum, aciem longam praemittendo ab adversario recedes.