hat auch · Augustus · der Kaiser mit grössem Lust · selbs gethon · die Fechter angericht · darzu geholffen . vnnd zugesehen · welchem dann Tiberius der drit · Römisch Kaiser Inn liebe der Ritterlichen Kunst Reichlich nachgeuolget hat · welchs alles Suetonius Tranquillus vnnd annder mer Inn Iren beschreibungen melden ·
Die Römer · hetten ein gewonhait das Sie Inn Gaistlichen sachen die Götter mit diser vbung des Ritterspils · auf gewonlichen Festtagen · vereereten · Im monat Martio · haben sie der Palladj · als ainner Göttin des Kriegs · ein gro°ß Fest namlich Funff tag lanng darunder dreÿ tag mit Fechten volbracht wurden · ganntz Eerlich gehallten · Inn welchen dreien tagen was ein besonderer Hauptman verordnet · der die Jugent zuerhaltung der manlichen redlichkait Im Fechten · Inn allen whoren zwaÿmal Im tag zu mörgens vnnd abents vnnderweisen sollt · als die leicht Brutj. vnnd sein begrebnuß beganngen werden sollt · haben seine zwen Sune Marcus · vnd Decius · den Fechtern gewinneter vnnd Clainnater · darumb zu Fechten reichlich verordnet · desselben gleichen · als · Probas · der Kaiser wider die Teutschen den sig erlanngt vnnd Triumphiert · hat er den Göttern zu Eern · neben anndern vierhundert bar Fechter · vor der gemaind Fechten lassen ·
Gleÿchsfals · Domicianus · etwann beÿ der Nacht · vnd Gordianus auf ein zeit Funffhundert Bar Fechter · vnnd hernaher Kaiser Philippus · der Arabier · Inn ainnem Schaw°spil · dem Römischen volckh vnnd seinem Triumph zu ehrn Tausent Bar Fechter · auf ain tag hat Fechten lassen · Deren Exempel · vnnd geschichte~ weren noch vil zuerzelen · aber mich bedunckt das dißmals zu ainer anzaigung gnug seÿ ·
