loblich mit allerleuchtuertigkait selbs hallten · Inn Irrm Fechten · auf den Schulen den neid vnd haß herfurprechen · vnnd das die Jungen · die alten · auf den Fechtschulen etwann gar verachtlich halten · vnnd Inen also Iren mutwillen zu gebrauchen verhenngen · Vnnd zu dem sich selbs des weins gar zuuil mißbrauch~ Derhalben vil leichtuertiger vnainigkait darauß erwachset · der Oberkait grossen verdruß · vnnd der edlen kunst mercklichen abganng mit sich pringet · Welches dann alles diser Edlen vralten Ritterlichen kunst · mer zu ainer außreitung · dann zu ainner pflantzung diennet · Des mir von hertzen laid · vnnd solchs zu melden ( · der edlen kunst zulieb · ) mit schweigen lieber vmbgeen wo°llte · dann dise vntugenden auch zu kainem Burgerlichen Regiment gar nicht diennen So wollte ich auch alle fromen Redliche Fechter · gern zu dem nutz vnnd fro°men des vatterlannds raitzen vnnd anfueren · Inn hoffnung das es Inen mit ewigem lob vergolten werden sollt · /
Plutarchus · schreibet Inn seinnen Hoflichen spruchen das der treffenlich hochgeleert man Caxiltus befragt wurde · welchs doch die loblichisten Stet weren · denen er auf dise weis geanntwurt hat · Das dise Stet · Inn welcher sich die Burger · nicht vmb Eergeitzigkait noch oberigkait miteinannder zanncken sonder so ainer den anndern mit Mannlicher tugendt ( · doch on aufrur · ) begerte zu ubertieffen · vnnd den gemainen Nutz zu furdern · gern der maist sein wollte · am allerbesten vnnd sicheristen weren · Derhalben die Götter der Spartaner alle mit harnasch vnnd wheren angethan · gemacht wurden · als wollten sie damit zuuersteen geben · das auch die Götter selbs der faulkait vnnd muessigganng Feind · vnnd gehessig weren · Es will sich aber schier Jederman auf den wollust vnnd faulkait verantwurten vnnd furgeben · man kundt dannocht land vnd Leut Regieren vnnd erhallten · wann schon das Ritterspil des Fechtens nicht wie Im anfang also gar Im schwanckh gange · Dann dise Kunst pringe auch freche stoltze · vnnd verwegne leichtuertig leut mit sich derhalben wol darauf zu schawen seÿ, Dennen wais ich nit bas zu antwurten · dann wie die warhait selbs ist · das laider vil personnen · so sich diser Ritterlichen kunst · mit aigner frecher mutwilligkait zu lernen anmassen · vnnd das
