Page:Cod.10825 184v.png

Zwen schnit gegen zwaien abnemenn.

Item wann Ir zusamen gond so schick dich also in dises stuck, Stand mit deinem linggen fuß vor, vnnd halt dein Sichel in deiner rechten hand in der ho°ch gegen dem Mann, schneid Im damit nach seinem hals seiner rechten seitten, Schneidt er dir also oben zu, vnd du mit deinem rechte~ fuß gegen Im steest, vnd heltst dein Sichel in ainem vndern schnit gegen dem Mann, so fall Im mit deiner linggen hand in seinen rechten arm, scheub Im den damit wol ubersich, vnd schneid Im wol vnden bey der A°chsen nach seinem rechten arm, Schneidt er dir also von vnden zu, so erwisch Im mit deiner linggen hand sein rechte, vnd scheub die wol ubersich, so nimbst du Im seinen schnit hinwegk, In dem zuck dein rechte hand behend wid~ an dich, vnd schneid Im nach seinem rechten furgesetzten schenckel, Schneidt er dir also vnden zu, so fall Im mit deiner linggen hand auff sein rechte, nimb Im das damit ab, vnd zuck dein rechte hand wid~ an dich, In des schneid Im nach seinem hals, vnd trit damit von Im zurugk,