Page:MS 26-232 119v.png

das weist die funft figur

Item das Ist das dw In allenn anpinden solt Starck sein mit der gleuen vnd mit dem Schwertt vnd wen dw an bindest So Bleib starck darann vnd zeuch nit ab alweg mit dem ortt des gesichst Remen das lert die 19 figur

die da Spricht das Schutten fur henck allen treffenn hawen vnd Stechenn

Item wen dw Starck pist So merckstu wol ob er hert oder Schwach Ist vnd das Ist das fawlen oder empffindenn

Item haw Im ein oberhaw zw dem knopff [!] starck versetzt er vnd Ist waich an dem Schwertt so setz Im den ortt ab auff sein linke seyttenn So var von Im vnten auff durch sein Schwertt mit deinem knopff vmb sein hals vnd reitt fur dich oder wend dein Roß vmb so velt er Item versetzt er den den ober haw hoch So nim den schoff griff

Item versetzt er dan hawen So treib den Sunen zeigen mit dem Schwertt vnter dem kinbackenn

Item haw Im aber ein oberhaw zw dem kopff fertt er hoch auff mit der versatzung So var mit deinem gehiltz vnten sein elnbogen vnd mit dem Rechten fus vnter sein Steick leder vnd Stoß oben mit dem gehiltz vnd heb vnten mit dem fus So velt er Contra

Item versetzt er dir den oberhaw mit der were So var hoch auff mit deiner Rechten hand vnd heng Im sein [!] ortt vber sein Schwert vnd zw seinem gesicht oder der Brust vnd setz Im an

Item wen er dir versetzt mit der Zwer So var hoch auff mit deiner Rechten hand vnd far Im mit deiner Rechten hand mit dem Schwertt vber sein Rechten arm vnd begreiff Im sein arm mit deinem Rnd reitt fur dich So nimstu Im das schwert Das lert die vierd figur Item die Stuck soltu treibenn auß der neben hutt pey dem Rechten pein

Wiltu gerüet lanck Jagenn das ser müet Wer das weret | So wind das auch ser verserett | werd er furpas | vach den zawm vnd bis nit las