Page:MS 26-232 120r.png

Item wen dw Reitest mit der hutt zw dem man So stich gerichts fur dich lanck auß mit dem gerechten atm dem man zw dem gesicht oder der prust So muß er versetzenn

Item wen er dir den schich [!] versetzett vnd weist den ortt beseitt auff sein linke seytenn so far mit dem Rechten arm hoch auff In das ober geheng stich Im zw dem gesicht

Item wertt er den stich auff so reitt an Inn vnd far mit deiner linkenn hand von Inwendig auff vber sein Rechten arm vnd begreiff den zawm vnter seinem Rechten arm vnd mit linker verkerter hand So hastu In gefangenn bey dem arm so stich sein messer oder tegenn do mit such die ploeß oder truck mit deyner Rechten hand sein zawm dem Roß vber die ornn So machst dw In zawm loß

Bedenck die ploeß
Such messer nit wartt der Bloeß

Das Ist wan dw Im mit dem zawm also gefangenn hast als vorgeschribenn Stett vnd Ist er gewappent so soltu wissen wo dw Im ploeß vindest also das dw In gewinnen mugest

Item also Such die ploeß eine vnter die vchssen

die andern auß wendig In die handschuch oder dener In der handt

Item die dritt In dem glenck oder armpug oder vnter dem gesicht

Item die bloeß soltu suchenn mit dem ortt des schwertzs wan dw magst mit schlegenn mit dem Schwertt noch mit dem knopff dem gewappeten man nit geschadenn das lert die zehend figur Aliud

Item die Stuck treib auß der hutt von dem Satell pogenn

Item wen dw mit der hutt Reitest zw dem man haut er dir dan zw dem knopff [!] von seiner Rechten seitenn ein oberhaw So far mit dem Schwertt auff von dem satelbogenn vnd wind damit hoch fur das haubt das der dawm vntenn kum auff die linken sey So vechstu den haw In dem gehiltz In des schich zw dem gesicht zw seiner linkenn seyttenn

Item weist er den ab zw seiner linkenn seyttenn so Reitt neben Im hinweck vnd haw In mit der langenn