Page:MS 963 66v.jpg

Item weyst er dyr den stych ab zu seyner lyncken seyten, so reyt neben in hyn weg und hau in mit der langen schneyden hynden in den hals, das ist der turckisch hau etc

Das schwert nemben

Item wen er dir den stich abweist zu seyner linkhen seiten und wil du den thurckhischen hau nit treiben, so reit mit fur in und far im mit dem khnopf auf uber sein rechte hanndt, und stos in mit deinem gehiltz fur dich und mit der linckhen hanndt begreif seinnes schwerts knopf und reit fur dich, so nimbst du im das schwert

Item haut er von seiner linckhen achseln auf dich ain oberhau, so windt dich mit deinem schwert hoch auf den rechte seitten gegen seinen hau und stich im zu seiner rechten seitten zu dem gesicht

Item reyt eynner auff dych mith der gleffen und an welcher seyten er dyr wyl an setzen, da wynt und stych in zu dem gesycht oder wo du in magest gehaben

& figura

Das leret dye achte fygura, dy sprycht: Wynt im dye recht hant, sez im den rechten ort zu dem gesycht und das ist, das du solt albeg wynden mit dem schwert zu ros aus der hut, es sey gegen der gleffen oder gegen dem schwert und in das denn man stechen zu der ploss