Page:MS 963 73r.jpg

Item das ryngen heysset das verporgen ryngen und ist der pesten eynes, wan es gleychet sych wol dem schoff gryff wen du damit eynen heltest, er sey starck oder schwach, und magest in also halten, das er sych nyt geweren mag, wie lang du wylt, wan du in andersch recht begreyffest

Item wyltu aber thun als dy leychvertigen meyster, dy dye kunst gerynge wegen durch rums wyllen und machen dy kunst gemeyn, dye sye kennen oder wyessen, und darinn werden sye unbehalten von andern weysen meystern und von rytter und von knechten

Item wyltu das gerynge offenbar machen oder yder man sehen lassen, sothun im also reyt mit deynner lyncken seyten an seyn rechte und greyff mit deynner rechten hant an seyn rechten arm und vornen bey der hant und truck den vor dych und reyt umb, begreyff mit deyner lynncken hant an seynnen rechten ellbogen und stos den von dyr, und mit der rechten hant stos seyn rechten arm aber uber deyn lyncken arm gar wol und heb also mit deynem lyncken arm gar wol seyn rechten arm uber sych auff, und also hast in gefangen und gepunden on alle pant und magest in also halten, wy lang du wylt, das geth zu beyden seyten zu

Der Vorgriff merck,
der pricht furbas seyn sterck