Page:MS 963 67r.jpg

Item wen du im zu der ploss stychest, wert er denn den stych und kump nachent an dych, so begreyff im seyn rechte hanth mit deyner lyncken und treybe dye ryngen, dye vorn und noch geschryben sten etc

Item das leret dy 9 fygur, dye sprych wer den stych weret, dem fach seyn rechte hant mit deyner lyncken

Das ist eyne hut mith dem halben schwert etc

Item wan du hast gelegt deyn schwert auff deyn lyncke hant zu dem zaum, so los den zaum faren und greyff mit der lyncken hant mit in dye klyngen und halt deyn schwert vor dyr etc

Item reyt eynner zu deynner rechten seyten auff dych mit der gleffen, so sez ab mit dem schwert von deyner lyncken hant, unde schlach deyn schwert under dye uchsen und sez im an etc

Item leystu in der hut und hauet er dyr oben zu, so var hoch auff und fach den hau zwyschen deyner bader hende und heng im den ort zu dem gesycht und sez im an etc

Item auch magest im mit dem halben schwert ab sezen was auff dych gestochen wyrt, es sey mit der gleffen oder mit dem schwert, darin soltu mit der lyncken hant deynem schwert auch zu hylff komen, wen es dyr not ist als der gleffen, als dy secht fygur lert etc

Zwenn strich ler
mit lerer hant gegen der wer