Page:MS 963 66r.jpg

Item wann er dyr den stych versezet und weyst den ort ab beseyt auff lyncke seyten, so fare mit dem rechten arm hoch auff in das ober gehenck, stych im zu dem gesycht

Item wert er den stych und fert hoch auff, so reyth an in und far mit deynner lyncken hant von ynwendyg auff uber seyn rechten arm und mith der lyncken verkerter hant, so hast in gefangen bey dem arm

Bedenck die plos,
such messer nit wart der klos

Das ist also wan du in mit dem zaum also gefangen hast, als vor geschryben stet, und ist er gewoppnet, so soltu wysen, wo du ime plos vyndest, also das du ingewynen magest

Plos

Item also such dy plos eynen undern uchsen,

dye ander aus wendygk yn dye hant schuch oder kofer etc

Item dye dryte in den gelencke, den armen bug oder under dem gesycht

Item dye plos soltu suchen mit dem ort des schwerz, wan du magest mith dem schwert mit schlaen aber mit dem knopff dem verwapenten man nycht schaden, das leret dy 10 fygura etc

Item dy stuck treyb aus der hut von dem satelbogen

Item wan du mit der hut reytest zu dem man, hauet er dyr zu dem kopff von seynner rechten seyten eyn ober hau, so far mit dem schwert auff und wynt do mit hoch auff vor das haubt, das der daumen under kum auff deyn lyncke seyten, so fechstu den gehaue in deyn gehylz, in des stych im zu dem gesycht zu seynner lyncken seyten etc turckysch hau