Page:MS 963 70v.jpg

Jacht mann dych rechter,
ker umb wart vechter
mit armenn vohenn,
so mag dir keynn schadenn nohen

Item das ist, das du mercken solt, wan du mit eynem zu samen reyten solst ob er dyr zu der rechten seyten wolt zu reyten und dir vorteyl wolt an gewynen, so las in dor zu nyt komen, sunder went dych alweg mit deyner lyncken seyten zu seyner rechten und wart, das du nahen an im komest, und wart seynes rechten arm mit dem ryngen und stucken, dy for und noch geschryben stenn etc

Item wer das soch, das du gedrungen wyrst, das du flyhen must und reyt dyr dan eyner hynden zu deyner rechten seyten mit eynem spys oder schwert und wolt dyr ansezen, so wynt dych aus dem stych gegen im auff deyne lyncke seyten, und wynt myt deynem schwert gegen seynen spys oder schwert, das deyn daum unden kum und sez im an

Item reyt er auff deyn lyncke seyten, so went dych auff deyn rechte gegen im und wynt mit dem schwert als vor und sez im an

Das leret dye 24 vygur, dye sprycht ob man dych jaget von paden seyden, ker um lynck, so er recht kympt,

auch soltu in der flucht behent seyn, also das du dych wol kennest umkeren in dem satel von eyner seyten zu der andern und mit dem hynter dych stechen zu peyden seytten