Page:MS Dresd.C.94 326v.png

Item willtu aber thun als die leuchtuertigen Maister, die Ire Kunst gering wegen durch Roms willen, unnd machen die Kunst gemain die sij kinden, oder wissen, unnd darumb werden sij unbehallten von anndern weisen Maistern unnd von Rittern und Knechten

Item willtu das Rinngen offenbar machen, oder Jederman sechen lassen, so thuo Im allso reitt mit deiner lincken seitten an sein rechten, unnd greiff mit deiner rechten hannd sein rechten arm fornen beij der hannd unnd truckh den fur dich, unnd reid umb mit deiner lincken hand greiff an seinen rechten Elenpögen unnd stoß den von dir unnd mit der rechten hannd stoß sein rechten arm aber uber dein lincken arm gar wol unnd heb also mit deinem lincken arm sein rechten arm ubersich auf, unnd also hastu In gefanngen unnd gepunden on alle pand, und magst In allso hallten wie lanng du willt, das geet zu baiden seitten zu.

Den vorgriff merckh
Der pricht furpaß seinn sterckh

Merckh das Ist das du alweg sollt vorkomen, Eee wann er mit den greiffen unnd Ringen die du wol vernommen hast und zuvorauß mit den vier hauptringe damit last er In zu kainnem Ringen oder stucken kumen, das ist der scho^pffgrif, der ungenannt griff, des Sunnen zaigen, unnd der verporgen griff, unnd des fahens mit dem zaum solltu damit auch nit vergessen, Unnd wann du die Ringen wol kanst so mag dich hart Jemand on schaden von dem Roß werffen ˙⁄.