Page:MS Germ.Quart.2020 181r.jpg

Kumpstu mit der rechten seiten ann sein rechte so treib die hernach geschriben ringn

Wenn ir baid verfelt habt mit den glefenn magstu denn mit der lincken seyten nit kumen an sein rechte so halt unnd wirff in mit dem sunnen zaigenn oder mit dem schaffgriff unnd wie du die zway ringenn treiben solt das vindestu hernach geschriebenn

Aber ein ringn

Kumpst du mit der rechtenn seitenn an sein rechte hat er denn sein schwert gezogenn unnd vert domit auf unnd wil schlahenn so begreiff mit der linckenn hant sein rechtenn arm hinder dem elnbogenn unnd heb in vest unnd mit der rechten hand begreiff sein schwert beÿ dem knopf unnd ruck im das aus der hant

Oder

Nim im mit der rechten sein messer oderr sunst andere wer und arbait im domit zur plös das lert die eilfft figur die spricht also (druck vast stos vom zaum und such sein messer)