Page:MS KK5126 125v.jpg

Dier mit slegenn vnd mit dem chnopf arbaitenn volg im nach mit nachraysen vnnd laß nit ab chumenn so mag er weder ge slahenn noch gestechenn wann es wierd zw churcz

was dw an seczenn wild das secz an das gesicht ann die drussel oder an die tennck achsel oder vnnder die ṽechsenn vnd dring in also von dir hin /

Item merck ebenn seczt im ann die rechtenn seytenn so trit ab mit dem tennckenn fueß seczt dw im an die rechten seytenn so trit ab mit dem rechtn fues secz dw im ann der tennckenn seytenn so tritt ab mit dem rechtenn fueß vnd lauf im durch vnd druck In an ein seytenn vnd lät er dier dy seytenn stoß in an die haubenn das ist das chrennckist an dem mennschenn

Wenn dw im hast an geseczt vnd ist er lenger wenn dw so druck also geleich fur dich hin ab das der ort also geleich vber sich ge vnd im wol in die ring geuast

yst er churczer wenn dw so las dein swert mit der hannd absinckenn vncz auf die recht huff vnnd also var auf vbersich mit dem ort vnd vnder die ring wol gesaczt als vor vnnd laß In nit ab chömen vnnd wil er denn mit dem chnopf arbaitenn so merck das nach volgenn mit dem ort so chann er zw chainem ding nicht chumenn

Item wider das anseczen in das gesicht prich also stich im vnden Im vnden [!] / die In // hannt die er vor fur hat geseczt auf der chling vnnd fuer in also aus dem chraiß

oder stich im vber sein vorgesaczte hand vnnd durch das swert vnd druck denn chnopf nyder zu der erdenn vnd secz ann

oder secz im ab zwischenn deinen paidenn hennden vnd mit dem chnopf gestossenn fur den hals vnnd Vnnden mit dem rechtn pain getretn hinder sein tenckenn vnnd dar vber geworffenn

oder secz im ab mit dem ort vnd im angesicht an sein gesicht

Item der durchwechsel mit dem chnopf vnd secz da mit ab

Item hat er die / chlingen / hant auf der // chlingen so stich im oben in die finger vnd heb vber sich auf

aber ein pruch wider das annseczenn Stich vndenn durch sein hannt vnd vber sein swert Enpur dein hannd chnopf vber sein tencke hannt vnd ruck domit nyder vnnd secz ann

Das seind die vnder haldenn vnd die auf sten zw champf vnnd im champf

Wenn er velt so val im alweg zw der rechtenn seytenn vnd mit dem ain chnye Val zwischenn seiner pain val fur seinenn hals vnd bis nicht zu gach das dw nicht vber in vallest vnd greyff nach seinem tegenn vnd zeuch denn deinen nit dw habst in dann gewis wil er dir dann in den teg[e]n vallenn so stich im zw der hand // _{/// vnd zuck nicht}

Nim sein arm zwischen deiner rechtn pain vnnd leg dich auf in twerchs vnd sterck dich vast vnd halt deine pain vast zw samen vnd greyff mit der tennckenn hand in seinen tennckenn arm vnd halt in also vnd arbait mit der rechteen hannd mit dem tegenn das get zw paidenn seytenn

wenn dw neben sein haldest vnd nym sein haubt vnder dein tenncks vechsenn vnd vmb fach in mit dem hals vnd leg dich mit dem leyb vnder sein anndlucz vnd arabait mit der rechtenn hannd

Wirstu in auf denn ruck so fal mit deinem tennckenn chnye in sein rechtenn arm vnd mit der tennckenn hannd für sein hals vnnd do mit druck in vast vnnd begreyff im sein tenncke hannd mit der rechtn vnd greyff mit der tennckenn hannd der rechtn zw hilf vnd halt im sein tenncke mit deiner tennckenn vnd arbait mit der rechten

velt er auf den ruck so begreyff im baide pain vnder dem chnye mit paiden henden vnd heb sy auf vnd val mit dem chnye zwischen seiner pain auf dy hodenn vnd halt im also paide pain mit einer hannd vnd arbait mit der andern mit dem tegen

velt er auf denn ruck so val im mit deinen paidenn chnye zwischen seiner pain vnd fas in bey dem rechtenn arm in dein tenncke chnyepüg vnd faß dar auf vnd begreyff sein tenncke hannd mit deiner rechtenn vnd druck im die vnder sein hals vnd halt die vest mit deiner tennckenn vnnd arbait mit der rechtenn

Wirft dw in auf denn pauch so val im mit dem rechtenn chnye hinden In das sloß vnd mit deiner tennckenn hand greyff vber sein haubt vornn ann