Page:2º Cod.MS.Philos.62 10v.jpg

Zue der 7. figura vom durchlauffen vnter den Arm

In dieser figura wirdt erstliches angreiffens, welches zue allem ringen in genere gehoret, auch beÿ allen figuren gedacht vnd demonstriret wird, des zuckens, des armwindens vnd des durchlaufens mit dem kopfe gedacht, welches auch zue beiden seiten zur lincken vnd zur rechten kan gemacht werden, wie in kegenwart ist gedemonstiriet worden, vnd diese figura augenscheinlich anzeiget

Das armwinden oder verrenken der arm oder eußerlichen gliedern, geschiht auch zue beiden seiten zur lincken vnd rechten, auch von auswendig vnd inwendig des leibs, wie die 32. figura auch 35. ausweisen, mus aber doch alle zeit mit verwendeter hand geschehen, nemlich also, wen ich einem andern seine rechte hand, von seinem leibe wil wegkwind’ so greiffe ich mit meiner rechten kegen seine rechte, vnd winde ihm dieselbige rechtens vnd, darnach greiffe ich mit meiner lincken hand auf seinen rechten elbogen, vnd ziehe mit der rechten zue mir vnd mit der lincken schube ich von mir, vnd trete auch mit meinem ganzen leibe hinter in, kan ihm also den arm zerbrechen, verrencken oder sonsten ferner nach dem gewichte vnd schweche des leibs angreiffen vnd zue bodem werffen wie die 36. figura gnugsam anzeiget, wie ich aber mit meiner lincken eines anderen rechte hand winden soll wil ich bei der 32 figura auch gnugsamb anzeigen.