Zur .31. figura explicatio des misthackens
In dieser figura kan man sond‘lich sehen wie meisterlich sich der Autor mit dem misthacken, den ich eine nach od’ Loesegriff nenne, dan mit diesen vndt anderen desgleichen griffe, kan man sich leichtlich schutzen wen man von einem andern vorwerts vber den ganzen leib gestoßet wird vnd in alle hohe wird aufgehoben, kan auch mit beiden henden gebraucht werden dieweill aber von diesen notgriffen beÿ der 14. figura gnugsamb gemeldet wird des gleichen auch in der 21. figura, ist nicht notig alhie viele davon zue melden, sondern ist dis alleine zue mercken bei dieser figura wie an sich loßmachet wen jemand von einem andern mit beiden henden vnten vmb den ganzen leib gefaßet wird, vnd follendts zu boden sol geworffen werden, kan man diesen oder dem andern notgriffe einen (wie sie bei den obgemelten figuren angezeiget sein) in der eile gebrauchen vnd sich los wirken darnach den kegenteil ferner nach dem gewicht vnd declination des leibes angreiffen vnd zue boden werffen wie in vorigen figuren gemelt ist
Eß wehre wol notig das man alhie auch ander loesegriffe oder nodgriffe her zue setzete, wie man sich solte losmachen wen man von zwen heschern bei beiden armen gefuret wird, oder wen man von jrmand hinterwerts vmb den ganzen leib gefaßen wirdt, weil es aber vmb mißbrauchs willen nicht öffentlichen zuschreiben ist, wil ichs alhier auch außen laßen, sol doch vertrawten leuten in geheimb wol gedemonstriret werden.
