Page:MS Thott.290.2º 141v.jpg

in die lungen. Und wenn der mensch des autemß betarff, So duot sich daz lid uff und zücht den den kalten lufft an sich und zücht ouch wider umb denn haissen lufft her uss, Also daz der mensche icht ersticke, und darumb so ist dem menschen nichtzit schädlicherß zu dem tod, wenn die pestelentz Rengnirt, oder sonst böß fücht nebel oder wetter ist denn böser lufft. die maister die mainend ouch den den lufft und autem, der von dem menschen komet, besunder siechen menschen, wann eß ist dem menschen nichtzit bessers zu der gesundhait dann guotter und türrer lufft, dann Es tött den mensch nichtzit schneller denn böser lofft, dann ergaut von stund an in alle gelider und verunrainet daz plout und daz hertze inn dem libe. ~ ~

von dem magen

Der mag ist alß ain koch und glich alß ain hafen, darinn die spyse südet und töwet, und ist also aller gelider ain koch und ain knecht, wann Er kochet und berait allen gelidern die spyse vor und in daz Raichet. Die füchte hat er von dem trincken und die hitze von dem hertzen und daz fiure ouch von der lebern. ~

Maister allmonser spricht in dem buoch daz da haisset panthagin, daz ettliche gelider an dem menschen haiß und trucken sind und etliche kalt und fücht an der Nature. ~