Page:Cod.Pal.germ.430 066r.png

Waß vom pogen lanck kuembtt
Der ortt schnel daß abnymbtt
Dy kurcz schneyd ler wencken
Lanck czw haübt laß sencken

Hye sagtt der meyster eyn pruch wyder dy geraden hew dy vom pogen gehawtt werden und den pruch soltu alzo machen so dw auff yn hawest und er peugt seyn messer dar unter und verseczt und yndeß schecht er von oben nyder mit eynem geraden oberhaw yndeß trit albegen peseÿtt auß dem haw und haw ym nach dem kopff oder wyndt yndeß deyn messer gegen seynem und stich ym zw dem gesichtt oder so er auff dich schlechtt so wenndt deyn messer m mit der kurczen schneyden auff seyn messer yndeß wendt deyn hand und messer gegen ym mit der langen schneyden und haw yn durch seyn kopff etc. Sequitur textus.