Page:Cod.Pal.germ.430 035r.png

gegen dem gesicht oder ploß deyneß leybß und lest den ort neben dir peseyt außgan uff dy seytten so wechsel ym kunlich durch pleybt er aber mit dem ort vor dem gesicht oder gegen den ploessen so wechsel ym nicht durch sunder peleyb am messer und erbatt ym da mit zw der negsten ploeß so mag er dir nich nach geraysen noch an seczen etc Sequitur textus

Wiltu linck lanck unterhawen
Durchwechselß soltü dich frawen

Hye lert der meyster wye man durchwechsellen solt ym messer auß langen geraden unterhewen von payden seytten zw vor auß zw der lincken seytten Nota gee zw ym yn unterhewen von deyner lincken seytten daß der recht fuß vor gee und der linck dem rechten nachvolg alzo daß dy fuß yn schritten zw sammen kummen und haw dy hew außgerackten armen lanck eyn so dw den yn dem zw vechten czw ymb kumbst so thw geleich