Item wil er dir deyn hand mit dem gehulcz nyder stossen ynbendigß yndeß wyndt deyn messer gegen seynem daß dy kurcz schneyd unter stee und senck den ortt wol und far mit dem gehulcz hoch auff fuer deyn haubtt und secz ym den ortt an seyn prust oder far mit deynem messer czwischen ewer peyder auff seyn rechte seytten und schlag yn zw seynem rechten oren Wenn dw also mit dem messer czwischen ewer peyder durchgest auff seyn rechte seytten So soltu albegen den ortt sencken gegen der erden und daß gehulcz hoch fuer daß haubt haben etc
Item wil er deyn handt aber nyder stossen ynbendigß mit dem gehulcz So wyndt gegen ym auff mit deynem messer und erhoech daß gehulcz und fal zw gewoppender handt und secz ym den ortt an seyn halz seyner rechten seytten wil er dir daß weren So erbat mit dem gehulcz
