Page:MS Thott.290.2º 147v.jpg

Die under satturno geboren werden, sind mit ainer schmale brust und trurig und hörend geren von bosen dingen sagen, und tragen gelich alß unsubere claider alß schöne und vermügen sich sich nit wol mit frowen, und hat doch von nattur alle bösse ding an im Satturnus erfüllet sinen louff in dreyssig Jaren und 400 und 40 tagen und 6 stunden, und von siner höhe wegen so mag man in selten sehen. und dz sind sine zaichen: der stainbock, der wasserman, die sind kalt und trucken an irer nattur, und glichent sich dem melancholicoß an siner nattur.

Hie sagt Juppitter von siner nattur und von sinen kind, wie die geren kinder schriben und lesen und ander künst.

Juppitter ist der ander planet und der ist glückhafftig und tugenthaft warm und frisch und ist ettwen vil träg an sinem louff und höret den zuo die tugenthafftig sind und ist herre der mannen die da dick bärte hand und werdent nit kal und wenn er also rengniert so gaut es frowen wol sie mit knaben gand und ist guot vor fursten recht suochen der planet ist genant Juppitter zu ain gelichnuß alß die maister sprechent wie ain abgot were den die römer und ander lüt hieltent für ainen got der sie vast gewerte und in ouch vast an ruofftent für ainen hellffer und berantter und versöner wenn so die römer irem got nit sin opfer gabant und er zornig ward uber sie so so baten sie den selben got Juppitter mit grossem ernste und andacht und brachtend im ochsin opfer daz er in wider hüllffe daz sie zu den genaden wider kämen gan dem got der uber sie erzürnt waß und die wyle der göte ainer zornig waß so torsten