Page:MS M.I.29 110v.jpg

Wil er mit klossen
Zu der brust stossen
Versetzen soltu dringen
Vnd die were an gewinnen

Hie saget der meinster eyn bruch so man eynem mit dem klotz oder gehultz in die brust stossen Vnd spricht also wil er mit kossen etc~

Den bruch mach also Wiltu schlagen zu sinem rechten oren Indes fert er dir zu der gewoppenter hant mit dem gehultz vff din brust Indes griff mit diner lincken hant forn an sin gehultz hinten an sin rechte hant vnd stos mit dinem rechten arm starck an sins messers klingen vnd schrit mit dinem rechten fus zu sinem rechten vnd stos starck vff din lincke siten ~  ~

Item schlestu eynem zu sinem lincken oren mit dem entrusch haulb vnd er fert dir mit dem gehultz gewoppent vff sin brust Indes far mit dinem gehultz gegen siner rechten siten vber sins messers klingen vnd griff mit diner lincken hant in sin gehultz zu siner rechten hant vnd riß mit dem gehultz starck in die recht siten nider vnd mit diner lincken hant schub starck von dir vff din rechte siten