Page:MS 3227a 32v.jpg

^# wer wol vorsetczit /
de[s?] vecht[en?] vil hewe letczit /
wen yn dy hengen /
kumpstu mit vorsetczen behende /

Das ist von vier vorsetczen / etc etc

VIer sint vorsetczen ·
dy dy leger auch sere letczen
¶ Vorsetczen hüt dich ·
geschiet das auch sere müt dich /
Ab dir vorsatzt ist ·
vnd wy das dar komen ist /
Höre was ich rate ·
streich abe · haw snel mete drate /
Setzt an vier enden ·
bleib droffe kere wiltu enden

¶ Glosa /:· ¶ Hie merke / das vier vorsetczen sint / czu beiden / seiten / czu itlicher seiten / eyn obers / vnd eyns ünders / vnd dy letczen ader brechen / alle huten ader leger / vnd wy du von oben / ader von vnden / eyme / hewe stiche ader snete / mit deyme swerte abeleitest / ader abweisest / das mag wol heissen vorsetczen / Vnd ab dir vorsatz wirt wy das dar kumpt / zo czewch rislich abe · vnd haw snelle mete czu / yn eyme hurte /

Ist denne das du eyme vorsetzt / ader abewendest eyn haw ader stich / zo saltu / czu hant czu treten vnd nochvolgen am swerte das dir iener icht abeczihe / vnd salt denne tuen was du magst / wy leichte du dich last vnd zümest zo nymmestu schaden / Auch saltu wol wenden / vnd allemal deyn ort keyns eyns brust ^keren / zo mus her sich besorgen

¶ Auch sal eyn guter fechter / wol lernen / eyme an das swert komen komen / vnd das mag / her wol tuen / mit den vorsetczen / wen dy komen aus den vier hewen / von itzlicher seiten / eyn öberhaw vnd eyn ünderhaw / vnd gen yn dy vier hengen wenn als bald als eyner vorsetzt von vnden / ader von oben / zo sal her czu hant yn dy hengen komen · Vnd als her mit der vördern sneiden / alle hewe vnd stiche / abewendet / als ist es mit den vorsetczen /