Page:MS 3227a 64r.jpg

HIe vornewt man · vnd vor / anderweit / dy stöcke vnd gesetze / des blozfechtens / meister lichtnawers · mit korczer vnd mit slechter rede / durch grösser vnd besser vorstendunge vnd vornemunge wille / Ab vor ichsicht ist geschreben · in den Reymen vnd in der glozen / unbedewtlich vnd unvornemlich / das daz mit slechter rede körtzlich werde öberlawfen /

¶ Czu dem ersten merke vnd wisse / das lichtnawers fechten leit gar an den fünff wörtern · vor · noch · swach · stark · Indes · / Dy eyn grunt / kern vnd fundament / seyn alles fechtens / vnd wy vil eyner fechtens kan · weis her nür des fundamentz nicht / zo wirt her oft bey seyner kunst beschemet / vnd dy selben wörter sint vor oft aus gelegt / wen si nür of das gehen das eyner vmmermer in motu sey vnd nicht veyer ader lasse · das iener icht czu slage kome / wen · vor · noch / bedewten / vorslag / vnd nochslag / als vor oft ist geschreben / vnd das gehet of das / daz do heisset / principium vnd finis / anhebunge vnd endunge / wen eyn ernster guter fechter · ficht dorüm mit eyme / das her mit syner kunst eynen wil slaen / vnd nicht geslagen werden / vnd das mag her nicht tuen an anhebunge vnd ane endunge / wil her denne wol anheben / zo schaffe her das her io den vorslag / habe vnd gewinne / vnd nicht iener / den eyner der do slet of eynen / der ist io /