Page:MS 3227a 88v.jpg

vnd aus itzlichen newn / Nu merke aber ander vire vnd aus itzlichen gen irer newne als vor / Wen her dich begreift an dyne brust vorne / zo drucke syne hende mit dynen von oben neder an dy brust / als vor / der hastu noch newne / daz ist nu das erste

¶ Daz ander als vor / mit deyme elbogen von oben neder / als vor vm syne hende gewunden / zo hastu doraus arber newne

¶ Das dritte von vnden of pey der brust / gestozen / zo hastu aber newne

¶ Das vierde von vnden of mit dynen knochen / zo hastu ir aber newne / Alzo hastu ir czwelfte / vnd aus itzlichen newne /

¶ Merke mit dem selben sloffe ^ader stossen vnd vm^mit den magstu eynen von dir brengen / wo her dich an grei fet / Wenn her dich an greifet pey dem ermel / do vorne pey der hant / ader kegen den ermeln an dem gelenke / ader mit eyner hant an dy brust / ader wo her dich an greift / zo magstu yn mit dem selben slon vnd mit winden von dir brengen / vnd dornoch magstu yn stozen wy du selber wilt / das her czu dir / mit nichte komen mag / noch mag / dich recht mit nichte begreifen oberal an dem ganczen leibe /

¶ Eyn ander czulawfen merke / wenn her czu dir nü springet / vnd du ym eyn peyn hast vorsaczt / zo mag her mit eym spronge dir entgen / mit eyner hant gegriffen noch dem peyn vnd mit syner ander hant an dy brust gestossen · das du of das hewpt vellest / Das ist do weder / wen her noch dem beyne grei fet / zo czucke is hinderweit / vnd rucke yn noch dir zo vellet her of das antlitzt

¶ Merke das ander gesetcze / wen her kegen dir springt / zo mag her dich vnder den armen vm greifen / vnd mit seym peyn hin noch schreiten / wirft dich of den / rucke gar harte / Das ist dorweder / wen her dich zo vm greift / zo valle balde vnd snelle of dy seite dyn / das ist dy beste büße / czu dem ringen /

¶ Merke das dritte gesetcze wen her czu dir springt ader schreit / zo mag her dich derwischen mit synen peiden vör dy prust dyn / vnd vellet neder vnd rückt dich of noch ym / vnd springt dir mit

syme fuze enkegen / vnd wirft dich ober syn hawpt /