Page:MS Bibl. 2465 111r.jpg

Ittem jetz thritt zu Im mit Annsetzenn mit stehen aus der obenn hutt vnnd stich mit krafft Inn sein visier / heutt Er übersich vnd will Absetzen so zuck nebenn Ab / vnnd stich Inn vnder sein Lincken Arm / schaw daß du satt stenndest vnnd dich nit überwegest dem gewicht noch / merck als baldt dein ortt hefft Ann Rüngen so schlag dein gehüls vnder dein Rechte ühsenn dring Inn vor dür hin oder sez im vnder den Rechten vchsen vnnd schlag den knopff vnder dein linck vhsenn an / vnnd dring von dir vnd las in nit abkumen vnnd zeich mit der Rehten den sebell vnnd arbeitt Im zum gelencken / oder mit vnnder hewenn ¶

Ittem thu als woltestu Inn mit dem klos / für das visier schlagenn als baldt du merckest das Er aussentt zuuer sezenn zwischenn sein beidt henndt so zuck bechenndt Ab / vnnd sez Im vnder die Recht vhsenn / vnnd merck wenn du Einer Also Ergreiffest mit ansezen vnnder die Reht vhsenn vnnd auch mit deinem sampff vnder dein Linck vhsen wüe vor gelertt / mit was listen dz gesichticht ¶ so mag er sein Sebell nit geziehenn das ist auch der fortheill mit dem Sebell ¶