Page:MS Bibl. 2465 67r.jpg

Dolchen Fechten vnd Ring stuck ⁋

Ihm dolchen sein drey Hutten nhemlich die oberhutt vnd vnderhutt zu beiden seitten die 3 hutt ist vor dir auff dem furgesetzten schen¬ckel oder brust mit gekreutzigten henden / oder sunst mit beidenn henden nhaer beisamen Item von dir sein nhur drey stich als ober vnder vnd zwerchstich / Am gegenman findestu aber Sieben blossen als Ancken / Kelen / Vchsen / Gelenck / Handtschuch / Kniekelen / gemecht / wiewol man sie nit all mit blossem leib braucht sonder Im harnisch mit dem kampf Dolchen. ⁋

Die erst Hütt Sthe mit dem Rechten vor / den Dolch vber dem Haubt / das die spitz dem man Ins gesicht sthet. Item sticht dir einer es sey vnder oder oberrch / so stich ihm von oben mit dem threner durch / den andern durch das Kreutz wider hinein / den dritten ein Zwirch stich durch sein Lincke / fhar mit dem knopf von deiner Lincken wider vber¬sich In die vor genandt Hutt mit einem Durchriß. ⁋