Page:MS A.4º.2 03v.jpg

unnd die selbenn mit fleiß lernet dem unngeübtenn weit beforenn khumpt unnd in allem mit geschwindigkeit uberlegenn ist. Derenhalbenn zu unsernn zeitenn furstenn unnd herrenn disse ritterliche kunst nicht weniger liebenn unnd die zum hoechstenn befurdernn dan unsere altvetter, wie dann auch Euer Gnaden nebenn andernn freyenn kunstenn disser manlichenn kunnst mit ernnst annimpt und doher mich Euer Gnaden als ein unschuldigenn fechtmeister darzu beruffen Euer Gnaden inn solcher kunst zu unnderrichtenn, welcher ich in aller underthenigkeit mit willigem gemuth hab antrettenn, und dweil ich nit allein ein sonderlichenn anmuth zu solcher kunst, sondern auch e[ure] g[nedigen] gnedigen unnd geneigtenn willenn gegenn mir gespurt und gefunden, hab ich keinn weiß unnd weg domit ich Euer Gnaden in solcher kunst underthenig dienen kunte sparenn woellenn, derhalbenn disses fechtbuch zu samenn gesetzt unnd alle stuck beschribenn, Euer Gnaden ubergebenn in unndertheniger hoffnung Euer Gnaden, werde nicht allein die stuck die sie bisher gelehrt, dardurch so sy lesenn wurdt in gedechtnus behaltenn, sondern auch vil geschwindigkeit und nutzbarliche