Page:MS A.4º.2 10r.jpg

Schaw das der erst seyest uff dem plan,
Ehe er sich legert greiff ihn ahn.

Daß merck also wan du mit einem fechten wilt, so schaw das der erst seist uff dem platz uff das du dich in deine furgenomene stuck bey zeit schicken mögest, da soltu als dhan mit hewen treiben anhaltten und sich in ein leger oder stuck zu schicken, nach seinem gefallen, sonder solt schawen das du ihn uber eylest, mit verborgnen drucken . Ehe er sein gewahr wirtt wie dan solches der nach volgent reim weitter erclertt.

Indes hab acht versthe mich recht,
Ihn triff ehe er sein leger schlegt.

Daß ist wan du in zufechten bist, so hab acht wan er schir bey dir ist, so merck als bald er sich stelt, als wölle er sich legern, so laß ihn nit rhuen oder darzu khommen, sonder ficht inmer furtt vor ihm durch, und dieweil er seines legers wahr nimbt, so greiff ahn der nechsten blöß zu, unnd stell dich sam du starck hawen woltest thu es nicht, sonder laß fehl abgehen oder verflig zu einer anderer blöß ahn, als baldt du mitt deiner klingen zum halben theil drin bist, oder