Page:MS A.4º.2 16r.jpg

Item hawt einer uff dich von oben wie vor, so haw von deiner lincken von unden gegen seim streich das du sein oberhaw hoch in der lufft fangest, als bald es glitscht, so haw also mit geschrenckten henden, den fordern kurtzen orth in eim zürckel, zu seim rechten ohr, und das in einer geschwinde schier zugleich zu gehen, nemlich das in dem die kling zusamen riren, so sol auch gleich mit die halb schneid von oben nider threffen.

Item in zugang stel dich mit geberden, als woltest von oben hawen, so bald du merckest, das er dem haw entgegen ubersich wüscht, also balt verwend dein ober haw in ein underhaw ehe es recht oben rirt das ist dem feller gleich. ¶

Item hawt er von unden, so fal mit deiner langen schneiden von oben drauff, in dem es glütscht, so zuck behend ab und schlag der nechsten blöß zu in einem flug oder schlag von seinem schwerdt umb mit der flech, in einem gewundenem schnal zur nechsten blöß

Wan du in hawest krump zur sterck,
Durch wend uberlauff damit merck.

Daß ist wan du einem ein krumphaw zuhawest, helt er hartt wider das du nit uberschrencken, oder ander arbeit, oben haben magst, so