Page:MS A.4º.2 23r.jpg

das muß er versetzen in dem er ubersich fehrt so zuck dein schwerdt in einem flug umb den kopf haw mit gekreutzigten henden die kurtz schneid uberzwer zu seinem rechten ohr, laß die linck handt wol uff gehen, so geht die kurtz schneid tieff, zuck wider umb den kopf, und reiß ihm sein kling von deiner rechten uberzwerch zu seiner lincken mit der flech auß, das dein schwert uber deinem haubt wider umbfligt, und laß ihm die kurtz schneidt tieff einschiessen zu seinem linck ohr, als bald haw zwen underhaw zu seiner rechten und lincken, indes haw dich wegk.

Item kompt dir einer fur: der gern von oben lang auff dich bindet oder sein ersten streich lang von tach uff dich thut, wan du dan nahet bey ihm bist, oder zu ihm kommest, so streich vor in durch, uberstich auff gegen deiner lincken: das dein schwerdts kling in sturtz uber deinem haubt umschiesse, gegen seiner lincken, indes laß dein schwerdt uber deinem haubt wider umschnappen, die recht handt uber die linck, und schlag also mit kurtzer schneidt zugleich mit seinem streich hinein zu seinem rechten ohr, wie oben gelert, machestu das recht, und thritst wol darzu, so triffestu gewiß, dan das stuck ist mir offt angangen, versetzt ers aber und fehrt auff wie er dan (so ers versetzen wil) muß uff fahren, als baldt zuck umb den kopf und haw ihm mit langer schneidt von unden uberzwerch zu seiner lincken spindel, nahet under dem knopf hinein zum knichel, under diessen zwo blossen wirt dir eine werden zuck dein gefeß wider ubersich umb dein