kopf und haw ein starcken langen haw zu seiner lincken uber sein kopf in diessem dritten streich thrit wol mit dein beiden fiessen in ein zwifachen thrit umb sein linck seitten so geht der haw wol ahn das ist ein guth ernst stuck, so du ein doheim suchen wilt.
Ein ander stuck auß dem Schilhaw.
Im zufechten wan du schier bey ihn kommest, so stel dich als wollest ein langen oberhaw thun in dem er auff fehrt dir zubegegnen, so verwende in der luft die kurtz schneid von deiner rechten gegen seiner lincken, und ruck dein knopf ubersich, schlag ihn mit der kurtzen schneid uber sein arm oder hend, thrit wol auff sein linck seitten laß also in einem zurckel fur uber lauffen und haw lang nach zur nechsten bloß, oder ficht auß den underhewen zu ihm.
Den schiller zwifachen
Item in anthrit so haw gegen seim haw ein schillhaw uff sein schwerdt von deiner rechten in dem es glitscht, so verkher dein schwerdt ahn seiner klingen und rutsch also uff seiner klingen gegen deiner lincken seitten auß thrit mit dem rechten furbaß gegen seiner lincken laß dein kling umb den kopf faren und haw den anderen schilhaw zu seinem kopf auch von deiner rechten tieff oben hinein zu seiner lincken, also das du zwen schilhaw einen wie den andern behendt uff einander schlegst mit einem zwifachen thritt gegen seiner lincken, das ist ein geschwindt stuck uff die langsamen fechten die die armen weit von sich fieren.
