 |
You are not currently logged in. Are you accessing the unsecure (http) portal? Click here to switch to the secure portal. |
Page:MS A.4º.2 25v.jpg
nechsten blöß einhawen das also dein schwerdt sein kling und leib zugleich trifft, oder so baldt dein sterck sein schwerdt riret in zusamen glitschen, die schwech zur nechsten bloß wenden mit schnellen, schnappen und winden ferner halt dich auch uff disse lehr wan du solche stuck fechten wilt gegen denen, er dir durchwechslen khan, Als nhemlich dieweil du dein[1] schwerdt in der lufft firest zu einem schilhaw oder krumphaw.
Item zuverschrencken verfellen was dergleichen ist, so bald du gewar wirst das er durchwechslen wil, so verfal auß solcher arbeit in langen schnidt der blöse zu die er dir geben[2] wirdt in durchwechslen, dan so offt er durchwechslet blöst er sich, und in dem du ihm zur bloß nachreisest, so wart mit der langen schneiden seines schwerts, wo er dir zu nah wolt khommen, das du mit der sterck gegen ihn wendest, und gleichwol mit der kurtzen schneiden uff seiner bloß bleibest, als bald du geriret hast, so verhar nit lenger, sonder laß abfligen, von einer bloß zur andern.
Die zwirch soltu auch halten werdt
Damit gantz wirdt dein kunst in schwerdt
Die zwirch ist auch der furnemen meister stuck eins in schwerdt, dan du solt wissen wan die zwirch nicht wehr, wehr es umb das halb fechten geschehen, sonderlich wan du under des manß schwerdt drinen bist, do du nicht mehr mit langen hewen durchs kreutz fechten kanst, ob ich schon fornen auch von der zwirch geschrieben, so viel, das wo einer fechten kan genugsam verstandt darauß kunde, aber dieweil ich nicht grossen
