Page:MS A.4º.2 19r.jpg

wind in einem schnal die kurtz schneid inwerts zu seinem kopf als baldt wind mit dem knopf unden wider durch uff dein Linck seitten und greiff mit deim knopf uber sein kling oder arm und reiß auß oder so dir das gewert wirt so nim andere stuck ahn die handt. ¶

Baldt schnel die schwech zum rechten dar
Zwyfach schnellen mit schilt dich bewahr.

Merck ihm zufechten khum in rechten wechsel von danen streich auff durch sein gesicht das dein schwert uber dem haubt umblauf in einer Rinde, thrit mit deim lincken wol auff sein recht und schlag mit der auswendigen flech von der lincken gegen seiner rechten uberzwerch zum ohr, nhim den kopf wol mitt wie hievor gemalt sthet, in dem es glitscht, so stoß dein knopf under deim rechten arm durch und schnel mit inwendiger flech in von unden auf in einen umbschnal in solchem umbschnal bleib hart ahn seim schilt, und truck hart von dir, helt er wider so laß dein schwerdt leiß auß zuck umb den kopf und schlag mit auswendiger flech zu seiner linck ein starcken glitschhaw uber dein handt, laß dein knopf wider under dem arm durch und schnel von inwendig hinder seiner kling zum kopf, bleib alweg hart ahn seim schilt, und wind in eyl wider herauß, so sthestu wider in glitshaw wie vor. Arbeit weitter was du wilt nach den 4 blössen, wie das zu brauchen sey ist hievor gelert. ¶

Item hawt einer ein oberhaw uff dich von seiner recht, so haw auch ein oberhaw gegen ihm zu gleich, in dem es glitscht, so stoß in eyl dein knopf under deim arm durch und schnel zugleich auch einwerts zum kopf, ehe das es recht riret, so zuck dein beidt arm also geschrenckt ubersich gegen deiner lincken und reiß an seiner klingen ubersich umb letzsher handt wider zu seim Lincken ohr von unden und schnel also wider mit auswendiger wie nechst hie oben, diß zweyfach schnellen sol behend zu gehen, und