Die 6 Treybenn.
Das erst threiben ist also, Sthehe mit dem rechten fuß vor unnd den Oberhaw unnd den underhaw zu samenn das der Dusekenn alwegenn vber dem haupt umbfliege zum Sturtz.
Das ander.
Stehe mit dem rechtenn vor wie oben threib vonn deiner Linckenn Achsel uber dein recht bein dem man durch die recht Strich Linie vonn unden unnd oben zu samenn mit sterck durch sein gesicht.
Das dritt.
Stehe wie vor, threibe den mittelhaw durch die mittel Linie vonn der Rechtenn unnd Lincken zu samenn.
Das viert.
Ist das Creutz vonn oben zu samenn threibenn starck auf den mann hinein.
