Page:MS A.4º.2 69v.jpg

Nebenhutt

In die Nebenhutt schick dich also Sthe mit deinem rechten fuß vor, halt dein wehr mit dem gefeß neben deinem rechten knie den orth fur dir uff die erd, wie disse figur zeigt,

Wan du also in der nebenhutt sthest, hawt oder sticht einer uff dich es sey von unden oder oben, so greif mit deiner klingen wol von dir mit langer schneid uff sein kling bey der sterck, und schneid ihm sein haw oder stich von dir, gegen seiner rechten beseits ab, und in abschneiden thritt mit hinder thritten auß seim streich so khomstu mit deim Rappir In lincken wechsel indes thrit behendt beseits ferner auß uff sein Rechte seitten umb, und stich von unden auff zu seinem gesicht so sthestu in langen orth, sticht oder hawt dir einer zu, so schneid alle stich oder hew von dir undersich gegen thall ¶

Item sthestu in der hutt wie vor hawt oder sticht dir einer zu von seiner Rechten so schneid ihm sein kling von dir weg gegen deiner lincken wie vor so khomstu wider in lincken wechsel in dem es glitscht, so heb dein gefeß vbersich und haw von oben ein geraden Apicem oder schedelhaw schnidtsweiß durch sein gesicht, das du in hawen mit dem gefeß vor der klingen gegenthal khommest, das gibt ein feinen gezognen haw durch die eysenport, alls dan streich mit zweien zornhewen von beiden seitten durchs kreutz mit ausgestreckten armen und weittem standt von

dir weg ¶