Wechsell
Item nim von deiner lincken von unden ubersich starck auß und verwend In der luft dein wehr neben deiner lincken in Ochsen, indes trit mit deinem lincken fuß umb sein recht seitt, und würff ihm also ein stich von unden durch den pflug zu seiner rechten hüfft ¶
Item nim mit halber schneid auß dem wechsel sein herkhomenden stich mit sterck ubersich auß, das dein wehr in der lufft umbfleugt in Rechten Ochsen, und indes wurff in von unden durch den rechten pflug ein stich zu dem gemecht oder furgesetztem schenckel
Merck sthestu in lincken wechsel, so nim auß mit der fleche das dein wehr uber deinem haubt umbschieß, traw ihm den hertz stich zuck unnd haw von deiner rechten, durch sein furgesetzt bein und stich in durch den lincken Ochsen uber die handt zum gesicht. ¶
Item nim auß mit halber schneid, wie gelert und stich ihm von oben ein zum gesicht als dhan ein kreutz noch ¶
Item nhim ubersich auß starck von dir und laß umb den kopf faren und haw ihm auswendig zu seinem rechten schenckel, als dhen haw wider von deiner rechten ein dempfhaw durch sein gesicht unnd auff sein wehr. ¶
