Merck wan dir einer oben zu sticht, so wendt dein gefeß vbersich in lincken Ochsen, setz ihm also sein stich ubersich ab als es glitscht, so stich in inwendig zum gesicht, indes laß dein orth gegen der erden sincken, und laß dein kling neben deiner lincken durchlauffen, stich uber die handt zum gesicht Zuck dein gefeß ubersich das dein kling neben deiner Rechten ablaufft und haw auswendig von deiner Lincken durch sein recht Achsell, so sthestu in rechten wechsel ¶
Item setz sein stich ab wie oben gelertt, bleib also in bandt an seiner klingen und wend dein kling ubersich gegen seiner reiß auß uff dein linck seitt, heb indes dein gefeß ubersich unnd haw von deiner rechten inwendig durch sein Rechtenn schenckel, so khommestu in Lincken wechsel sticht er ferner auff dich, so spring mit dem lincken fuß wol uff sein rechte seitten und stich auß dem wechsel gleich mit ihm in, arbeitte weitter mit der eyssenport zu in. ¶
