Page:MS Bibl. 2465 105v.jpg

zusamen vnnd streck dich fast vnnd greüff mit deiner lüncken handt An sin lincken Arm, vnnd helt denn fast, vnnd Arbeitt mit dem degen wie hernach folgen wirtt

¶ Wie mann die drey vorgemelten wechr brauchen soll ¶

Merck Im Erstenn Anthritt gehe In der oberhutt zu Im vnnd stell dich mit geberdenn Als woltest In zum gesicht stehen thu es nit sonder schlag od[er] haw vonn oben nider nach sein knie bucklen thriffest oder nit so far behendt mit denn henden übersich vnnd schlag Inn mit dem bickell, zum kopff, Außen über seinen Rechtenn Arm, oder schlag In auff sein gelenck des nechst das dir werden mag, zuck bechenndt vmb dein kopff vnnd las die Reht fahren vor der lincken hanndt vnnd greüff domit hünder deiner lincken Inn die klingen vnnd schlag vonn deiner Rechten Ein mittelschlag nach sein helm, Es sej mit dem bickell oder hawer, oder mit dem klos, Er greüff dein bindt wüder mitt deiner Rechttenn hanndt vnnd thritt wüder zu Ruck daß du dich wüder Erhalest, vnnd hab fleißig Acht das Er dür khein streich geb Auch las dür mitt Annsezenn sonder weich Im kreis so viel es leiden will