Scheittler ¶
Ist also stanndt im Ochsenn wie die figur des Ochses außweist vnd haw von vndenn mit der halbenn schneidt durch die scheittel linie das dein wechr übersich verfligt um denn tag ¶
Blenndhaw ¶
Im zufechten kum in Pflueg zu deiner rechtenn, Indes trit vnd heb die henndt übersich zum verhengenn, auff die recht seitten draue im auff die rechte, mit dem hefft, schnell Inndes mit der flech vnd gecreuzigten henndenn zu dem Lincken ohr ¶
Brelhaw.
Also, kum im zufechtenn in Ochsen zu rechten, Inndes zuck das schwertt vmb denn kopff drit vnnd schlag mit Inwendiger flech überzwerch ann sein schwert, laß die henndt vmbrelen vnd schlag mit der flech über dj handt wider dohinn ¶
Kurtzhaw ¶
Also standt mit dem rechten fus vor im hengetten ort zuck übersich über den kopff vnnd hawe mit kurtzer schneide vonn deiner lincken, von vnden zu seim rechtenn Orhtt oder arm, inn dem treffenn soll der daumen oben stehnn
