Mittel oder handt arbeit Im nachvolgen
Anbinden darf keines explicirens, dhan ein Jeder fechter wol weis als offt die schwertter zusammen Riren, angebunden heist
Bleiben
Ist also zuuersthen wan einer ein haw, auff ein blöß einhawet mit langer schneidt, vnd als baldt den haw wider ahn sich zuckt, als wöldt er zur andern bloß hawen, thut es aber nicht, sonder schlecht wider mit kurtzer schneidt doselbst hinein. vnd das heist bleiben, so man mit hawen vff einer bloß bleibt. Item wann einer In banden des schwerts bleibt zuwartten auff des andern furnhemen, biß das er sein gelegenheit ersihet, weitter zu arbeitten.
Schneiden
So dir einer hatt angebunden In dein schwerts klingen so merck als baldt er vmbschlecht oder sonst vom schwerdt abgeht, so schneidt ihm stracks mit langer schneidt vff sein arm. der schnidt sein vier, von oben zwen, von vnden 2 vff beidt seitten.
Vmbschlagen.
Ist wan einer von eim bandt vmb schlecht zur andern bloß.
Nachreissen.
Nachreissen ist seinem schwert nachvolgen der nechsten blöß zu nemlich vff disse weiß wan dir einer oben zuhauet, vnd dieweil er das schwerdt aufziht zu dem
