Page:MS Bibl. 2465 004r.jpg

Kniehelhaw.

Item so einer Im Sprechfenster sthet, vnd der ander auch oder sonst hoch kompt das sein kling hinden vnder sich hengt, so haw mit zwurchschlegen von vnden auff, zwuschen dem knopf, oder hinder dem knopf In die handt.

Glitzhaw.

Im zufechten gehe mit dein schwert durch den Ochsen, tritt vnd schlag vber die handt mit der flech zu sein lincken ohr das sich die halb schneidt mit glitschen vnder sich senckt zu seiner rechten achseln

Windhaw.

So einer vor dir sthet mit außgestreckten armen Im langen orth, so komme Im zufechten mit dem Rechten fuß vor, das schwerdt Im hangetten orth, Indes zuck, Indes zuck[!] vmb den kopf vnd haw mitt langer schneidt von der lincken außwendig vber seinen Rechten Arm das dein schwerdt Im schwung zwüschen seinem kopf vnd schwerdt zu seiner Lincken achseln auß siehet, zuck widerumb zur zwirch oder hengettorth ¶