Page:MS Bibl. 2465 016v.jpg

krumbt auff behenndt ⁋ Würff dem ortt auff die hendt, Das ist wann auff dich vonn dach hawett, so hastu gegenn Im, vnnd im lufft verwendt die schneidt geschrenckt vnnd schlag seinen beden henden zu, trit mit den beiden fußen woll gegenn seiner linckenn seittenn so geeht das stuk ann ⁋

Krumpt wer woll sezett ⁋
Mit schritten viel heu lezt ⁋

Das mustu also verstenn wann dir einer von seiner rechten oben zuhawet So haw gegen im, vnnd mit mit deinem rechten fus woll zu seiner lincken seittenn Itz verschrenck das schwert mit gecreutzigten armen so kumbstu über sein schwert in dj schranckhut, Itz schneid Indes mit langer schneidt dem backen vnnd dem hals zu, daraus goht edle vnnd hew arbeit vnnd leuff des recht Inndes mit ⁋

Haw krumpt zu den Flechen ⁋
Wiltu die meister schwechenn ⁋

Daß verstannd also, wann dier einer oben zu hawett aus der hut von tag so haw auch gegen im von deiner rechtenn seitten aber krumpt mit geschrenckten armenn, so kumbstu mit deiner kurtzen schneide an sein flechen vnd schwech stoz in sein streich das heist Itzt suh Indes die obenn schnidt zwischen seinem schwert vnd dem man, do kumpt aber die wonig arbeit, vergiß nit mit deinem rechten fus zu seiner lincken seitten so gocht das stuck desto beßer ann vnnd bist woll versetzt ⁋