vnnd nach dem Elenbogen greiffen vnnd dornach der man zugewinen ist darnach mustu ein Ringes fur dich nhemen, dan es last sich nit alwegen ringen vnnd fechten, wie es in den buchern geschriben ist, Es tregt sich offt viel anderst zu darumb mustu alweg darauff bedacht sein.
Feler zweifachen.
Im zufechten felest seinem lincken Ohr dieff genug mit langer schneidt, er wuschet ihm nach, wiles versetzen, du wirfest das schwert In ein Zirckel, vnd vorstillest ihm seinem Rechten ohr zu, als baldt du sihest das du geruret hast, oder dropfen, so magstu den alten schnidt, das ist die pleiben machen, du truckest ihm dein schwerdt mit langer schneidt, vber beide arm, das er sich nicht wehren khan. Was ist aber das gesagt, zweifach es furbas, Schneidt ein linck biß nit laß, Es ist alles ein stuck, vnd hangt ahn einander, dhan wan du dir armen also schneidest oder truckest, so mustu fürbar zweifachen, das ist, du must den man wol mit dem lincken fuß vmbtretten, das heist Linck In schritten, biß nit laß, damit mainet der Reim es muße geschwindt zu gehn, dan der gegen man feüret auch nicht, vnd das heist zweifachen.
