Page:MS Bibl. 2465 019v.jpg

Schilhaw brauchen wil, das ist wan er sein arm kurtz von ihm streckt, so mag er ihn nicht wol erreichen, so magstu frolich durchwechslen, so kombstu ihm mit trit vnd stich ahn sein rechte seitten, das heiset angesiget, ist als viel geredt du kommest ihm zu, vnd bringst In auß seiner arbeit vnd furnemen.

Schilg zu dem orth
Vnd nhim den halß ohne forth

Wan der man sein orth lang gegen dir streckt als etlich Fechter Im brauch haben, so schlegst ihm den orth zu, vnd stell dich als wolst oben lang darauß hawen, thu es aber nicht, sonder haw kurtz starck darauff, itzt trit baldt vnd stich dem halß zu, das ist ein gutter alter stich, dienet auch zu dem kampf, die alten fechter habendt viel auß den sachen gefochten, Itzt aber last man die stich nit gern zu von wegen des einlauffens das heist

Schneidt durch die kron
So brichstu sie schon

Das ist wan einer sein schwert fur sich holt, vnd mit der langen schneidt gegen deinem streich lauft, vnd so du es merckest, das er dich also dreffen wil, so schneidestu vnder seinem schwerdt durch, das ist fast wie das durchwechslen, so hat vergebens kronet du must aber bey Zeitten durchwechslen oder schneiden