Page:MS Bibl. 2465 021v.jpg

Von den tritten

Trit bricht, Was man ficht, Macht er zu nicht, Es ficht einer vff erden wie er wolle, wan er nicht recht trit, so ist es vergebens. Darumb ist der spruch In den zwolff Reglen begriffen, vnd gemacht.

Wer drit nach heuen
Der darf sich seiner kunst wenig frewen.

Ein ider streich muß sein trit han, dan sie mussen gleich gohn das stuck geht sonst nicht ahn, es leigt viel ahn dritten, dhan wan du zu fru oder spatt triest so bringstu dich selbst vmb dein stuck, die trit machenn das dem gegenn Fechter sein arbeit nit ann gehen, sonnder die deine, Du must dem man das Endtrich oder weitte abstellen Im angrieff, so vermeint er, Er hab dich gewüs, so bistu aber ferner von Im, dan du hast dich vertretten, herwiderumb vermeint der man du wollest gemach zu Imtretten, so bistu eilents bej im vnd greiff an, Es ligt große kunst vnd listigkeit im trit, vnd ligt die reihen mos daran, daruon alle Fechter sagen, Darumb merck wen du schier bej dem man bist, so laß dich mit denn heuen mercken, als trettest groß weitt mit, bleib aber mit den fießen nach bej einander stohnn, streich dieweill den man heimlich ab wie einer der ein thurn beschißen will, baldt du meinest es sej zeit, so trit weitter mit denn fießen vnd greif dapfer ann ⁋